蛇叔：「窄边框够抢眼 重点係唔贵」- Sony Xperia

阅读157

Sony Xperia X系列即将开卖，相信好多人会将焦点放喺最贵嘅Xperia X Performance，以及最平嘅Xperia XA身上。我自己就支持Xperia XA多啲，所以先拣佢做评测，如果你都想知道佢值唔值得入手，就记住入嚟睇吓详细内容喇。

【设计】窄边框 仲有独立卡槽！

Xperia XA係X系列三部新机中嘅入门款式，价钱最平，但个人认为佢风格最似日系机。虽然一样属于「Unified Design」，但佢除咗採用窄边框设计，仲拥有2.5D玻璃屏幕同纤薄机身，同X或X Performance比较视觉上都更有新鲜感。不过用料冇其余两部咁豪华，机背只係胶製，中框并非一体成型，惟有两侧用金属边，指纹扫瞄电源键冇埋，然而Xperia XA都有个绝对优势：X、X Performance均为共享卡槽设计，Xperia XA就係Dual SIM、microSD两个独立分开。

◆ Sony Xperia XA
◆ 右侧设有开关、音量同相机快门掣。
◆ 背面係胶壳，有别于其他X系列嘅金属壳。
◆ 机底提供microUSB接口，旁边係喇叭。
◆ 窄边框比其他X系列手机抢眼。
◆ 机身较X Performance（左）稍微薄一啲。
◆ 可以同时放入Dual SIM同microSD卡。

【规格】打机畅顺 720p反而係优势 ?

Xperia XA係几靓仔，可惜佢始终係一部平价机，只搭载MediaTek Helio P10处理器，安兔兔测试录得约44000分，成绩唔算高。不过我试过玩咗TsumTsum、白猫等几只游戏，都冇出现窒机情况，原因应该同佢行720p解像度有关。另外，佢配备2GB RAM同16GB ROM，RAM算勉强够用，但ROM装多几只游戏已经冇位，好在支援microSD记忆卡扩充空间，可以将app资料搬入去。720p解像度唔高，但配合返2.5D玻璃，骤眼睇唔太觉佢有起格。整体效果比其他720p屏幕好，缺点係色温偏冷兼相对淡色，建议买完自己调节吓色温。

◆ 搭载MediaTek Helio P10八核处理器。
◆ 安兔兔录得约48,000分，排名比较低。
◆ 16GB ROM，实际可用8GB，即係预设已佔近一半容量。
◆ 2GB RAM闲置时大约有550MB Free RAM。
◆ 插入microSD可以将app资料搬到记忆卡。
◆ 屏幕色温偏冷，亦比其他X系淡色。

【温度】机背较暖 但手握位唔太影响

Xperia XA唔用金属机背又咁薄身，相信发热程度唔会有几严重，但试用期间无论影相定係打机， 机身一样有少少暖。热力主要集中喺机背顶部，少量会传到中框，温度分别约38度及31度，情况可以接受。

◆ 开咗白猫10分钟之后，机背录得37.3度。
◆ 开咗白猫10分钟之后，中框录得30.9度。

【相机】对焦快？相片细节一般

Xperia XA配备次一级1,300万像素主镜头，数字的确比同门低，但佢继承返X系列大部分功能，包括快速启动拍摄、追蹤AF等等。相机对焦反应亦拍得住Xperia X，但我发现显示蓝色圈后唔等于必定命中焦点，喺昏暗环境尤其明显，好似朗豪坊嗰张相就尝试咗7-8次先成功。质素方面，由于内置感光元件唔及其他X系机种大，细节点都会输蚀啲，放大相片后细节位会稍为鬆散。杂讯比想像中轻微，但重手除杂讯（NR）就导致相片油画化。

◆ 日景：曝光略微偏暗，细节唔算好清晰。
◆ 夜间：曝光适中，但细节鬆散同有少许油画化情况，相反杂讯唔算好多。
◆ 拍摄时显示咗对焦蓝圈，但事实焦点唔多啱。
◆ 结果要拉开距离先真正对啱焦点。
◆ 室内食物：白平衡尚算準确，但曝光都係稍为偏暗。
◆ 预载AR Effect、全景、贴纸等拍摄效果。
◆ 最高支援1080p 30p影片拍摄。
◆ 提供一系列场景模式。
◆ 同样支援快速启动拍摄功能。
◆ 前置镜头可以拍摄800万像素相片，但柔肤效果冇微调选项。

【电量】续航力约7-8个钟 充电较慢

我谂大家最关心Xperia XA嘅续航力同稳定性，原因有两个：首先佢得旧2,300mAh电池，其次係粒MediaTek（MTK）处理器。论续航力，我试咗2-3日，一般使用下大约9个钟由满电扣剩20%，打埋机时间会降到6个钟左右。启用Stamina省电模式后，续航力未见大幅提升，反而因为背景数据受限制，令WhatsApp、Facebook Messenger等通讯程式无法即时接收讯息。呢个时候就需要去应用程式设定页面嘅「电池优化」，将佢哋剔出名单之外，咁先唔会悭电模式变自闭模式。我觉得单凭设定唔喺Stamina嗰页，就已经需要扣分。再者，MediaTek机种通病係唔支援快速充电，Xperia XA亦唔例外，充电最多只做到5V 1.5A输入，即使电池容量普通都要花啲时间。

◆ 一般使用由满电到扣剩20%约花9个钟。
◆ 频密打机嘅话，由满电到扣剩20%只要6个钟。
◆ 开启Stamina省电模式后，要自己去应用程式页面剔走唔想受影响嘅app，否则就背景数据会被限制。
◆ 设有两种Stamina省电模式。
◆ 充电时只录得5.2V 1.36A输入。

【使用体验】系统比预期稳定 耳机推力较弱

起初我对Sony搭MTK处理器呢个组合冇咩信心，不过用咗几日都未曾试过弹app、死机或者重新启动，顶多同一时间开太多app，唔够RAM时会有些少窒，系统比预期稳定。若果要数缺点，第一係16GB ROM实际只有8GB用得，唔插microSD好易冇位；第二係音效，喇叭唔够大声，耳机推力弱，我用Sony h.ear In听Spotify觉得只係仅仅够声。

◆ 耳机推力比想像中低，连听Spotfiy都係仅仅够声。
◆ XA单靠底部喇叭发声，喺嘈吵环境下未必听得清语音。
◆ 一贯Xperia手机嘅介面。
◆ 喺画面中间下拉会弹出搜寻选单。
◆ 下拉式选单可更改捷径排位。
◆ 影像增强亦提供几个模式。
◆ 屏幕色温有微调选项。
◆ App drawer能够以不同方式排列。
◆ 页面设定可以自己加减版面，加入Widgets同解除安装。
◆ 每次连接电脑都要重新拣传输方式，冇记录习惯。
◆ 屏幕比其余两部X系列较易印上指纹，表面亦比较啜手。

【总结】蛇叔：「窄边框够抢眼 重点係唔贵」

论性价比，Xperia XA肯定赢唔到红米Note 3，不过佢赢在窄边框、外观设计，加埋Sony出品。重点係佢不过係卖$2,498，价位相对Xperia X同Xperia X Performance亲民，同埋拎佢出街其他人肯定知係新机嚟。

Sony Xperia XA规格：
网络：GSM、WCDMA、TDD-LTE、FDD-LTE
作业系统：Android 6.0 Marshmallow
屏幕：5吋（1,280 x 720像素）
处理器：MediaTek Helio P10
记忆体：2GB RAM
储存空间：16GB（支援200GB microSD卡）
镜头：1,300万像素连LED补光灯（后置）、800万像素（前置）
电量：2,300mAh
其他功能：Wi-Fi 802.11 a/b/g/n、蓝牙4.1、GPS、NFC
体积：143.6 x 66.8 x 7.9 mm
重量：137g

查询: Sony (电话: 8203 8863)

定价: $2,498